Kjo përmbledhje detyrash përfshinë një fond prej më shumë se 900 detyrash. Përveç detyrave elementare, libri ka mbi 220 detyra të rangut të olimpiadave dhe detyra konkursesh të ndryshme, të cilat përveç që mund të shfrytëzohen nga nxënësit, paraqesin një ndihmesë të madhe për arsimtarët. Po ashtu në libër ka mbi 230 detyra që mund të përdoren gjatë organizimit të garave për nivele më të ulëta.

Libri, veç tjerash, ka mjaft shembuj të zbatimit të trigonometrisë, qoftë në jetën e përditshme, qoftë në lëmitë e tjera të matematikës, dhe anasjelltas, në libër ka detyra që tregojnë se si trigonometria shfrytëzon aparatin e algjebrës dhe analizës matematike për zgjidhjen e problemeve të ndryshme në mënyrë më elegante.

Kapitujt I-IV në vete ngërthejnë kryesisht detyra, të cilat janë pjesë e programit për shkollat e mesme dhe programit për lëndën Matematika Elementare që ligjërohet në fakultete.

Duke pas parasysh rëndësinë motivuese dhe arsimore që kanë garat e ndryshme të matematikës në nivele të ndryshme (garat shkollore, garat e qytetit, garat komunale, garat rajonale, garat nacionale, garat ndërshtetërore), pastaj duke pas parasysh se nxënësit tanë kanë mundësi të pakta të përgatitjes për gara të tilla dhe duke pasur parasysh se detyrat nga trigonometria janë pjesë e këtyre garave, në kapitullin e pestë kemi paraqitur detyra nga gara të ndryshme, që nxënësve tanë do t’u ofrojnë pjesë të “kulturës trigonometrike” të shumë vendeve të botës.

Kapitulli i VI përmbledhë detyrat nga trigonometria të parashtruara në Olimpiadat Ndërkombëtare të Matematikës, duke filluar  nga viti 1959 e deri tek ato të vitit 2001, të prezentuara në SHBA (Washington) në Olimpiadën e 42-të  Ndërkombëtare të Matematikës. Në fund të këtij kapitulli, në njësinë, Probleme Shtesë nga Trigonometria, janë dhënë për zgjidhje mbi 100 detyra, të cilat kanë qenë të prezentuara nga profesorë të matematikës në revista të njohura të matematikës të karakterit ndërkombëtar. Qëllimi i kësaj njësie është që nxënësit, por edhe arsimtarët, të jenë në gjendje të zgjidhin edhe detyra kreative nga matematika.

Detyrat e paraqitura në kapitujt V dhe VI, janë të dedikuara për nxënësit që kanë talent për matematikë, për ata që dëshirojnë të marrin pjesë në gara të ndryshme të matematikës dhe që pretedojnë, mbase në një të ardhme të afërtë, të jenë ambasadorë të Kosovës në garat e matematikës në të gjitha nivelet. Gjithashtu detyrat e tilla mund të shfrytëzohen nga studentët e fakultetit të shkencave natyrore dhe atyre teknike si dhe arsimtarët e të gjitha niveleve (fjala është për ata që dëshirojnë të thellojnë njohuritë e tyre nga trigonometria).