Një enciklopedi e tërë e luftës së parë botërore që njeh historia e njerëzimit, luftë ku u ndeshën dhjetëra shtete e popuj dhe që, si asnjë tjetër, u ngul në kujtesën e botës. Vetëm në disa faqe, në disa ndërhyrje të shkurtra e rikujtime, tragjiku i madh, në dramën që flet për tjetër gjë ka futur pothuajse të plotë fushatën e madhe. Në secilin prej këtyre ndriçimeve të shkurtra si prej vetëtime, shpalosen pamje që zgjojnë mendime të mëdha. Le të kujtojmë vetëm njërën prej tyre, flijimin e Ifigjenisë në Aulidë, portin ku qe mbledhur flota greke duke pritur nisjen. Erërat e pengonin të nisej, fryma luftarake po bjerrej, falltari Kalkant këshillon flijimin e vajzës, të cilën Agamemnoni, pas një lëkundjeje, e pranon. Këtë dëshmi japin Eskili dhe tërë letërsia antike greke, por lexuesi i sotëm përpiqet të zbërthejë, prapa mjegullës mitike, një të vërtetë më të përpiktë.