Autori në këtë libër monografik me mjeshtri dhe një realizëm të skajshëm ka ndërtuar një arkitekturë kronologjike historike të ngjarjeve dhe të rrjedhave, pikërisht ai ka bërë një studim e hulumtim të plotë në të gjitha aspektet të historisë së Lëvizjes Kombëtare Shqiptare nga rrethe më të gjera në Tiranë, Prishtinë e gjithandej Trojeve Shqiptare, andaj autori në fjalë në këtë përmbledhje voluminoze ka arritur suksese në trajtimin e kësaj periudhe të rëndësishme të historisë së popullit shqiptar. Vetë titulli i këtij libri na bën të kuptojmë se çka gjejmë në te: pra, aty takojmë hulumtime, studime faktike nga kryengritja e përgjithshme shqiptare kundërosmane e vitit 1912, por edhe shkrime të tjera të autorit të cilat peshojnë dhe janë fundament për ne shqiptarët në përgjithësi. Ky libër të themi troq është një libër historik, ku takojmë edhe përmbledhje të tjera si fjalorin e termave osmane dhe të tjera burime të ndryshme nga literatura, arkivore, historiografike, dokumente, gazeta, revista, punime në dorëshkrim, artikujt të tjerë dhe shënime gjithpërfshirëse për autorin. Për këtë arsye ajo të tërheq më tepër dhe nuk ndahesh dot prej saj nga larmia dhe informacionet faktike që sjell.