““Kur Heshtja Flet”” - është një rrëfim i thellë historik, moral dhe shpirtëror, i ndërtuar mbi reflektime personale, rrëfime të drejtpërdrejta dhe analiza politico-juridike. Ky libër ndjek udhëtimin e autorit nga qelitë e ftohta të Hagës deri në malet dhe fushat e heshtura të Kosovës, përballë dhimbjes, sakrificës dhe së vërtetës së një populli që luftoi për të jetuar i lirë.
Në qendër të librit qëndron ideja se heshtja nuk është boshllëk, por hapësira ku piqen të vërtetat më të mëdha. Qelitë e Hagës, pritjet e pafundme, varret pa emër, lutjet e nënave, dhimbja e familjeve dhe sytë e fëmijëve që presin drejtësi, shndërrohen në zëra të padukshëm që flasin më fort se çdo fjalë. Autori e trajton drejtësinë jo vetëm si çështje ligji, por si çështje shpirti dhe ndërgjegjeje: sepse shpirti nuk njeh afate, procedura apo burokraci — ai njeh vetëm dhimbjen, amanetin dhe humanitetin.
Boshti qendror i librit janë vizitat që autori I bën në Hagë së bashku më ish kongresmenin dhe ambasadorin e SHBA-ve Tony Hall, duke sjellë momente prekëse të takimeve me ish-udhëheqësit e UÇK- së dhe të shtetit të Kosovës: Presidentin Hashim Thaçi, kryeparlamentarët Jakup Krasniqin e Kadri Veselin dhe deputetin Rexhep Selimin, të cilët prej vitesh mbahen në izolim. Autori nuk i sheh ata vetëm si figura politike, por si bartës të një amaneti historik e moral, mbi shpatullat e të cilëve po ngarkohet barra e një populli të tërë. Në kapitujt për Hagën, procesi përshkruhet si një gjyq selektiv, që nën petkun e drejtësisë ndërkombëtare rrezikon të kriminalizojë luftën çlirimtare dhe të amnistojë krimet e shtetit serb.
Rrëfimi vazhdon në Burojë dhe Prekaz, atje ku vetë toka është kujtesë. Në vendlindjen e Presidentit Thaçi dhe në kompleksin e Jasharajve, autori përjeton heshtjen e shenjtë ku historia nuk lexohet, por ndihet. Aty ku u derdh gjaku që e ngriti kombin, ai kupton se heshtja nuk është mungesë fjale, por një zë që të thërret të mos harrosh.
Libri merr një dimension tronditës njerëzor në rrëfimet e personave të dhunuar gjatë luftës dhe në dëshmitë e familjarëve të të vrarëve. Në ato momente, thotë autori, heshtja nuk është qetësi — ajo është britmë, është amanet. Zërat e tyre i japin librit frymën e kujtesës kolektive të Kosovës: ata që nuk janë më flasin përmes nesh.
Në këtë udhëtim autori nuk është vetëm. Krah tij qëndrojnë miq të rrallë të Kosovës: Ambasadori dhe Kongresmeni Tony Hall, Gjenerali Kicklighter dhe shumë të tjerë nga mbarë bota. Lutjet, letrat dhe zëri i tyre moral përfaqësojnë ndërgjegjen amerikane dhe botërore përballë një procesi të ndërtuar mbi interesa politike dhe heshtje selektive. Kjo miqësi dokumentohet si dëshmi se edhe në errësirë, drita ekziston.
Libri ndërthur emocionin me analizën e kurthit juridik e politik që iu bë Kosovës, popullit të saj liridashës dhe vetë aleatëve të saj. Autori sjell kronologjinë e kësaj skeme, nga raporti i Dick Marty-t te themelimi i Dhomave të Specializuara, nga roli i Rusisë dhe Serbisë në deformimin e narrativës për Kosovën, deri te rreziku që padrejtësia të institucionalizohet nëse nuk sfidohet me këmbëngulje. Një bosht i fuqishëm i librit është nderi, besa dhe shpirti shqiptar, jo si folklor, por si kod moral që e ka mbajtur kombin gjallë ndër shekuj. Autori argumenton se e vërteta është oksigjeni i lirisë dhe boshti i identitetit tonë.
Në kapitullin e fundit, “A ia vlejti?”, përballë pyetjes më të madhe, autori jep një PO të dhembshme dhe të shenjtë: Ia vlejti, sepse mbi tokën e përgjakur sot rriten fëmijë që qeshin lirshëm, të të gjitha etnive, feve dhe ngjyrave; sepse mbi heshtjen e varreve ndërtohen shkolla dhe këngë; sepse nuk u luftua për urrejtje, por për dinjitet. Sepse ky ishte edhe vizioni dhe amaneti i heronjve dhe i vetë UÇK-së.
“Kur Heshtja Flet” është një testament i kujtesës dhe ndërgjegjes, një urë mes Hagës dhe Kosovës, mes varreve dhe ëndrrave, mes dhimbjes së kaluar dhe shpresës së ardhshme. Është një ftesë për ta dëgjuar heshtjen, sepse ndonjëherë, pikërisht heshtja flet më fort se çdo fjalë. Por është edhe një ftesë që këtë heshtja ta shëndrrojmë në forcë, në fjalë e veprim. Heshtja duhet të flet, përndryshe të gjithë ne bëhemi fajtorë të historisë, të cilëm po nuk e shkruajmë ne do ta na shkruan dikush tjetër, sic po përpiqen të na shkruajnë edhe përmes këtij procesi të montuar e shumë të tjerëve që janë duke u “zier”.