"...Shoqëria civile nuk kishte potencial për ta lëvizë qeverinë. Sepse, ajo duhej të krijonte sfondin kur gjarpri do të hiqte lëkurën e vet, të cilën e kishte bartur deri tash, dhe të dilte me një lëkurë të re e të shndritshme, si një lider modern. Por kjo, nuk u bë për shumë arsye, të cilat me gjasë do të jenë objekt i analizave të shumta. Kështu shefi vendosi t’i kërcej vetes në bark. Të bëj harakiri simulues. Të bëj diçka për ta rrëzuar vetveten, pastaj kur të ringrihet si feniksi nga hiri i vet, për çudi nuk do ta kishte në kabinet asnjërin nga ministrat që e pengonin, sidomos me imazhin e tyre. Ata ishin pjesë e lëkurës së moçme, të cilën tashmë e ka hedhur...."

Fadil Lepaja është një autor krejtësisht  origjinal, në letrat shqipe, i cili në shkrimet e tij përplot  humor, satirë,  metaforë, dhe përsëri me plot seriositet i trajton temat më të mprehta, më të dhimbshme, me një butësi njerëzore dhe guxim intelektual të veçantë.