Qëllimi i kampanjës për "Përrallat e Heronjve të Padukshëm" është të mbledhim fonde përmes shitjes së këtij libri, për të mbështetur shërbimet thelbësore të Organizatës për Fëmijët pa Kujdes Prindëror - OFAP, në mënyrë që fëmijët pa kujdes prindëror të kenë mundësinë të rriten në një familje me kujdes dhe shumë dashuri. 
Shërbimet që ne ofrojmë si mbështetje për këto familje janë seancat e nevojshme psikologjike, pedagogjike, dhe shëndetësore. 
Gjatë zbatimit të programeve tona, kemi pasur privilegjin të takojmë shumë nga këta “Heronj të Padukshëm”. 
Nëse po e pyesni veten se kush janë ata, provoni ti përgjigjeni pyetjeve të mëposhtme:
A e dini:
Kush i vendos emrin një fëmije të braktisur?
Kush i jep fëmijës qumështin kur askush nuk i përgjigjet të qarave në spitalin e lindjes?
Kush i blen rrobat e para për fëmijën?
Kush i shëron traumat e tyre të braktisjes dhe abuzimeve?
Kush bëhet familje për fëmijën?

Libri thekson rolin e heronjve të padukshëm që kujdesen për fëmijët pa kujdes prindëror dhe në të njëjtën kohë është një thirrje për të besuar në mirësinë, miqësinë dhe fuqinë e dashurisë, duke ofruar për të gjithë fëmijët, një botë ku ata ndihen të dashur dhe të mbështetur.

Me mbështetjen tuaj me blerjen e këtij libri, ju tregoni një akt dashurie që u jep këtyre fëmijëve mbështetje dhe një premtim për një botë më të mirë. 
Përmes faqeve të tij, do të gjeni tregime të mbushura me shpresë dhe besim në triumfin e dashurisë. 
Ky koleksion i bukur përrallash për fëmijë ka për qëllim të sjellë ngrohtësi, shpresë dhe frymëzim në zemrat e tyre të vogla.