Pasuria misterioze që fati i cakton bonjakut Pip, hedhja poshtë me mendjemadhësi e miqve të vjetër, brengat dhe vuajtjet që shënojnë udhën e ekzistencës së tij drejt pjekurisë së vetëdijshme, përbëjnë themelin e një rrëfimi ku ndjenja e fajit dhe e dhunës themelohen me shenja groteske, në sajë të të cilave komedia merr ngjyrime therëse dhe mizore. Shkruar më 1861, libri në fjalë, një roman i pjekurisë artistike, Shpresa të mëdha, shpalos të njëjtën freski dhe vetvetishmëri të asaj që cilësohet si kryevepra e shkrimtarit të madh anglez, David Koperfildi, shkruar dhjetë vjet më parë.