Libri “Bijtë e gënjeshtrës” i Scott Peck është një libër që të tërheq që në faqen e parë, sepse është shkruar me një gjuhë të thjeshtë dhe të kuptueshme për cilindo. Pavarësisht titullit, që është shumë intrigues, shtrirja e autorit zgjerohet shumë, deri në zona pranë religjionit dhe praktikave fetare, të cilat konsiderohen si jashtë fokusit të shkencës. E veçanta e librit qëndron në atë, se e keqja njerëzore nuk është diçka abstrakte jashtë nesh, por një realitet, shpesh therës dhe i dhimbshëm, që mund të shkatërrojë jetët e disa njerëzve dhe të atyre përreth. E keqja, madje, shtrihet në shumë sfera ku vepron qenia njerëzore: individuale, familjare, shoqërore, si dhe politiko-ushtarake. Ligësia shpesh maskohet me vellon e dashurisë dhe të afeksionit në marrëdhëniet familjare dhe sociale. Autori, me shumë elegancë dhe mjeshtëri, duke sjellë shembuj dhe nga përvoja e tij personale, na shpalos efektin që ka e keqja njerëzore, si dhe mundësitë për ta adresuar, dhe na sugjeron disa rrugëdalje për të shpëtuar.